Cyfranogiad Cleifion a’r Cyhoedd
Mae cyfranogiad y cyhoedd yn allweddol i gynhyrchu ymchwil sy’n berthnasol i anghenion a phryderon pobl sy’n byw ledled Cymru. O ganlyniad, bydd aelodau o’r cyhoedd yn rhan o bob agwedd ar waith y Ganolfan, er enghraifft, drwy helpu i lywio’r agenda ymchwil a gweithio gyda Grwpiau Datblygu Ymchwil, a chynghori ar ddyluniadau astudiaethau a chynyddu ymwybyddiaeth ymhlith y cyhoedd.
Sarah Peddle
Am Sarah
Sarah Peddle
Ymunais i â’r gymuned cyfranogiad y cyhoedd ym mis Mai 2017. Rwyf bob amser wedi ymddiddori yn y maes hwn, ac wedi chwilio am gyfleoedd i fod yn rhan ohono. Mae gennyf gefndir ym maes Mathemateg/Ystadegau ac rwyf wedi gweithio fel rheolwr prosiect ar gyfer cwmni ymchwil cymdeithasol. Mae rhan fawr o’m gyrfa wedi bod ym maes llywodraeth leol, gan weithio ar lefel rheoli uwch am fwy na 9 mlynedd. Mae cymryd rhan mewn amrywiaeth o weithgareddau cyfranogiad yn rhoi’r cyfle i mi gyfrannu at ymchwil iechyd a gofal, ac rwyf wedi cwblhau hyfforddiant i sicrhau fy mod i’n cymryd rhan mewn ffordd effeithiol.
Rwyf wedi datblygu nifer fawr o sgiliau, gwybodaeth a phrofiad drwy gydol fy ngyrfa, ac rwyf yn mwynhau fy rolau mewn cyfranogiad yn fawr iawn gan eu bod yn fy ngalluogi i i ddefnyddio fy sgiliau wrth gyfrannu at faes sydd o ddiddordeb i mi, gyda’r nod o gynnig budd i’r gymdeithas ehangach yn y pen draw. Mae gennyf ddau o blant, ac mae hyn ar y cyd â chyflwr iechyd cronig wedi fy mherswadio i roi’r gorau i weithio amser llawn am y tro, gan gynnig y gallu a’r cyfle i mi ymgymryd â’r rolau hyn.
Rwyf yn awyddus i ddefnyddio’r profiad sydd gennyf, gan fy mod i wedi bod yn gyfrifol am reoli data, gwybodaeth, cynllunio a rheoli perfformiad, ymysg pethau eraill, y maent yn berthnasol ac yn werthfawr mewn rolau cyfranogiad cyhoeddus ehangach yn fy marn i. Rwyf wrth fy modd i fod yn aelod lleyg gyda’r Ganolfan ar gyfer Iechyd y Boblogaeth, fel rhan o’r Grŵp Ymgynghorol ar gyfer y Blynyddoedd Cynnar a’r Pwyllgor Llywio Cyfranogiad Cyhoeddus.
Dr Helen Davies
Am Helen
Dr Helen Davies
Mae’n fraint i mi fod yn rhan o dîm ymgynghori’r Ganolfan Genedlaethol ar gyfer Ymchwil Iechyd a Lles y Boblogaeth, Cleifion a Chyfraniad y Cyhoedd. Nyrsio yw fy nghefndir proffesiynol (fel darlithydd er anrhydedd) ac mae gennyf fwy nag 20 mlynedd o brofiad ymchwil yn gweithio mewn amrywiaeth o leoliadau ymchwil, gan gynnwys; gofal iechyd a lleoliadau addysgol. Mae fy niddordebau ymchwil yn cynnwys; ymwybyddiaeth ofalgar, rheoli clefydau cronig, diabetes a chyflyrau gwynegol. Mae cynnwys y cyhoedd a chleifion (PPI) wedi bod yn rhan hanfodol o’m hymchwil. Fel ymgynghorydd PPI, rwyf yn gobeithio cyfrannu at lais a barn cleifion a’r cyhoedd, i helpu i lywio ymchwil a wneir gan y Ganolfan.
Dr Rachael Hunter
Am Rachael
Dr Rachael Hunter
Mae Rachael yn fam i ddau o blant, yn Seicolegydd Clinigol Siartredig ac yn Uwch-ddarlithydd mewn Seicoleg Glinigol ym Mhrifysgol Abertawe.Cafodd Rachael ddiagnosis o Sglerosis Ymledol yn 2012. Yn y gorffennol, mae hi wedi gweithio mewn gwasanaethau iechyd meddwl yn y GIG a bellach, mae’n addysgu myfyrwyr israddedig ac ôl-raddedig yn ogystal â bod yn rhan o ymchwil i sut mae pobl yn ymateb i salwch. Mae’n gweithio’n agos gyda’r trydydd sector, gan gynnwys ‘Thrombosis UK’ ac ‘Overcoming MS’; elusen ryngwladol sy’n addysgu, yn cefnogi ac yn grymuso pobl ag MS gyda dewisiadau ffordd o fyw a meddyginiaeth sy’n seiliedig ar dystiolaeth i wella canlyniadau iechyd.
Samanta Gudziunaite
Am Samanta
Samanta Gudziunaite
Anthropoleg feddygol ac epidemioleg yw cefndir Samanta; mae wrthi ar hyn o bryd yn astudio am PhD ym Mhrifysgol Abertawe, yn gweithio mewn ffisioleg gwyddor anadlu pediatrig. Yn ystod ei gradd israddedig, cymerodd ran mewn dau leoliad rhyngwladol fel cynorthwy-ydd cyfathrebu ac ers hynny mae wedi gweithio gyda sawl corff anllywodraethol yn gydlynydd ymchwil. Roedd rôl ddiweddaraf Samanta gyda Doctors of the World, lle bu’n cyd-lunio ceisiadau am grantiau ac adroddiadau, gan gynnal a dadansoddi data ansoddol yn ogystal â chreu grŵp llywio sy’n cynnwys unigolion gyda phrofiad o system ceisio lloches y DU.
“Ar ôl bod ar ochr arall grwpiau PPI yn y gorffennol, roeddwn am weld a oedd ffordd y gallwn helpu drwy gyfrannu fy mhrofiadau. Rwy’n gredwr cryf y dylai’r holl waith ymchwil gynnwys pobl yr ydych yn gwneud y gwaith ymchwil ar eu cyfer! Gwnaeth siaradwr gwadd yn un o’m cyn brifysgolion ddweud, ‘nothing about us, without us!’, a hyd heddiw rwy’n credu’n gryf yn y geiriau hyn. Mae grwpiau PPI yn ffordd wych o gymryd rhan gyda’ch grŵp ymchwil lleol”.
Cysylltwch â ni
Os hoffech wybod mwy neu i gofrestru i dderbyn ein cylchlythyr, cysylltwch â Soo Vinnicombe, Arweinydd PPI drwy e-bostio s.vinnicombe@bangor.ac.uk
Bwriedir y dudalen hon ar gyfer cleifion ac aelodau o’r cyhoedd. Os ydych yn ymchwilydd neu’n sefydliad sydd ag ymholiad, ewch i’n tudalen ‘Gweithio Gyda Ni?’ am ragor o fanylion. Nod digwyddiadau a gweithdai yw hwyluso ymchwil a datblygu cydweithrediadau newydd ac fe’u cynhelir drwy gydol y flwyddyn. Ewch i’n tudalen ddigwyddiadau am yr wybodaeth ddiweddaraf am ein gweithdai sydd ar ddod.
Canllaw newydd i gyd-gynhyrchu a ddatblygwyd gan ymchwilwyr yn y Ganolfan – CORDS
Mae CORDS yn ganllaw newydd wedi’i ddatblygu gan y tîm yn y Ganolfan. Ei nod yw darparu eglurder ar sail tystiolaeth ac enghreifftiau o brosiectau blaenorol wedi’u cyd-gynhyrchu gan aelodau’r cyhoedd a ddatblygwyd gan Ganolfan Iechyd y Boblogaeth. Mae’r canllaw hwn i arferion gorau yn cydnabod na ddylai cydgynhyrchu ym maes ymchwil fod yn ymagwedd ‘un ateb i bopeth’.
Mae’r grŵp PPI Ganwyd yng Nghymru wedi bod yn rhoi cyngor ac arweiniad i’r Ganolfan ar sut i ymgysylltu orau â theuluoedd BAME. Mae’r prosiect Ganwyd yng Nghymru yn archwiliad parhaus i brofiadau a chanlyniadau pobl sy’n cael babanod yng Nghymru. Mae rhagor o wybodaeth ar gael yma.
Astudiaeth Achos Cynnwys y Cleifion a’r Cyhoedd – Grŵp PPI Ganed yng Nghymru
Dyma Hope Jones, Ymchwilydd yn y Ganolfan Iechyd Cyhoeddus (CPH), yn siarad ag aelodau o’r Grŵp PPI, Ganwyd yng Nghymru, am sut i ymgysylltu â’n cymunedau orau.
Cafodd y fideo hwn ei gyflwyno yn Fforwm Ymgysylltu a Chynnwys y Cyhoedd Ymchwil Iechyd a Gofal Cymru ar y thema Amrywiaeth a Chynhwysiant (13 Mai 2021). Mae’n dangos sgwrs fer rhwng prif ymchwilydd Ganwyd yng Nghymru, Hope Jones, a dau aelod o’n grŵp Du, Asiaidd a Lleiafrifoedd Ethnig (BAME) yr astudiaeth cynnwys y cyhoedd a chleifion (PPI), Ganwyd yng Nghymru.
“Nod Ganwyd yng Nghymru yw ymgysylltu â theuluoedd ledled Cymru. Mae gweithio gyda’n grŵp PPI yn hynod werthfawr wrth ein hannog i ymgysylltu â’n cymunedau lleol. Mae cydweithio â’n grŵp PPI yn ein helpu ni i annog amrywiaeth a chynhwysiant ym mhopeth a wnawn, ac yn ein galluogi ni i gynrychioli pob math o deuluoedd yng Nghymru.” Hope Jones, Prif Ymchwilydd Ganwyd yng Nghymru.
Digwyddiadau a Gweithdai
Cynhelir digwyddiadau a gweithdai â’r nod o ymgysylltu â’r cyhoedd, y GIG, Gofal Cymdeithasol, y Trydydd Sector, ysgolion a’r lywodraeth leol/genedlaethol drwy gydol y flwyddyn. Ewch i’n tudalen Digwyddiadau er mwyn derbyn diweddariadau ynghylch ein gweithdai sydd ar y gweill.
Do you have a question?
If you have a research question, would like to work and collaborate with researchers at the Centre or if you have any other query, get in touch!